НОВЕ-НОВЕ-НОВЕ-НОВЕ
Послухайце шветочну писню Руснацох Републики Горватскей

Преславени Дзень Руснацох у Горватскей

У Миклошевцох 29. мая 2011. преславени 2. Дзень Руснацох у Горватскей. Прешлого року тота централна шветочносц отримана у Вуковаре а того року у Миклошевцох.  Програму орґанизовали Координация рускей националней меншини у РГ и Рада рускей националней меншини Општини Томповци, под покровительством Жупана Вуковарско-сримскей жупаниї Божи Ґалича, сопокровителя Општини Томповци и самих Миклошевчаньох.

Означованє Дня Руснацох почало пополадню з покладаньом венцох на памятнїк пострадалим у отечественей войни у Миклошевцох, а предлужело ше зоз Шветочну академию на сцени под вельким шатром у школским дворе понеже у Миклошевцох ище нє збудовани Дом култури лєбо пригодни будинкок за векши манифестациї.

 Госцох и присутних привитал та винчовал Дзень Руснацох у Горватскей, предсидатель Координациї рускей националней меншини у РГ Яким Ерделї а медзи иншима окреме привитал висланїка жупана Мату Ґолубичича, висланїка владики Крижевского Николи Кекича о. Владимира Седлака, заступнїка у Совиту за национални меншини РГ Звонка Костелника, заменїкох начальнїкох општинох Боґдановци Ярослава Медєша, Томповци Витомира Мудрого и Стари Янковци Михала Шайтоша та госцох зоз Сербиї - предсидателя Шветовей ради РРЛ Дюру Папуґу, подпредсидателя Националного совиту Руснацох Дюру Виная и о.д. директора Дому кулури Руски Керестур Владимира Малацка.

 На програми тиж присуствовали и предсидателька Союзу Русинох и Українцох РГ Любица Морхан, представителє општинских радох Миклошевци и Петровци, городох Заґребу и Осиєку, представителє руских КУД з Горватскей, а попри Миклошевчанох, програму з нагоди Дня Руснацох провадзели и велї патраче зоз Старих Янковцох, Петровцох, Вуковару.

 Швето Руснацом у Горватскей окреме повинчовали висланїк жупана Вуковарско-сримскей жупаниї Мато Ґолубичич, висланїк владики Николи Кекича о. Владимир Седлак и предсидатель Шветовей ради РРЛ Дюра Папуґа, а пречитана и винчованка предсидателя Националного Совиту Руснацох у Сербиї Славка Раца.

 У шветочней Академиї  участвовали здружени шпивацки хор - членох хорох з Осиєку, Вуковару и Винковцох, под дириґентску палїчку Зорана Циковца, соло-шпиваче Микола Пап з Винковцох, Михал Голик з Петровцох, дуети  Гелена и Ана Бучково з Миклошевцох, Ивона Гнатко и Томислава Ралиш з Вуковару, та Женска шпивацка ґрупа з Миклошевцох. Шпивачох провадзел здружени Тамбурови оркестер, составени з членох КУД з Осиєку, Петровцох и Миклошевцох, по аранжманох Мирослава Папа з Нового Саду, а под руководством Бориса Бучка з Микошевцох.

 У програми наступели и члени Тамбурового оркестру з Райового Села, а писнї наших поетох рецитовали Илона Гнатко з Вуковару, Мануела Дудаш и Ирена Надь з Петровцох, та Ана Бучко и Ксения Лїкар з Миклошевцох. Конферансу написал Дюра Лїкар, а водзели ю Гелена Бучко и Сандра Лїкар.

 Як госци, на Дню Руснацох у РГ наступели дует Андреа Бучко и Весна Надь з Руского Керестура, котрих провадзел Народни оркестер Дому култури Руски Керестур.

Средства за означованє Швета обезпечели Вуковарско-сримска жупания, Координация руских радох у Горватскей, Городска рада Вуковар и општини Боґдановци, Дреновци и Стари Янковци.

 Жридло: Рутенпрес

Пририхтала:А.Балатинац