ЗАҐРЕБ, 21. новембра 2009.

Фото албум

ОТРИМАНИ ДРУГИ ДЗЕНЬ ПРЕДСТАВИТЕЛЯ РУСКЕЙ НАЦИОНАЛНЕЙ МЕНШИНИ ГОРОДУ ЗАҐРЕБУ

У познатим ресторану  „При пивоварнї“  у  Илици  всоботу 21. новембра отримани „Други дзень представителя рускей националней меншини  города Заґребу“  або у народу познати  „Руски бал“. Окрем Руснацох зоз Заґребу програми присуствовали и слїдующи госци:  Елизабета Кнор, спред городоначальнїка городу Заґребу; представителє  мадярскей, македонскей и талиянскей националней меншини города Заґребу;  Мирко Федак, предсидатель українскей националней меншини у Сисацко-мославацкей жупаниї и Алекса Павлешин, предсидатель Дружтва за українску културу.

На початку програми мр Ириней Мудри, представитель рускей националней меншини городу Заґребу, представел нову заставу и герб горватских Руснацох, як и шветочну шпиванку „Браца Русини“, а потим пригодну програму виведли члени КУД  „Яким Гарди“  зоз Петровцох. Так танєчна ґрупа  виведла  штири руски танци у хореоґрафиї Звонка Костелника, а шпиваче Михал Голик, Давид Морган, Анита и Иринка Надьово  одшпивали вецей руски шпиванки. Танєчнїкох и шпивачох провадзела орхестра Звонка Еделинского.

После урядовей програми петровски гудаци грали и (шпивали) за танєц. Атмосфера була барз добра так же ше домашнї и їх госци вешелєли длуго споза пол ноци. На одходу до своїх домох були им понукнути аж три дарунки:  кнїжка Дюри Лїкара  „Най ше нє забудзе “ (Руснаци у Горватскей),  ЦД зоз шветочну писню горватских Руснацох  „Браца Русини“  и часопис  „Нова думка“  число 153.

(Я.П.)   

Назад на новосци