З активносци Руснацох городу Заґребу

ПОСЛЕ  20 РОКОХ РУСНАЦИ З ВОЙВОДИНИ ЗНОВА У ЗАҐРЕБЕ

     Далєкого 1988. року тедишня Сцена АРТ Дядя з Руского Керестура госцовала у Заґребе зоз театралну представу на руским язику «У Едену на востоку». У медзичаше була война у Горватскей, Югославия ше розпадла и формовали ше нови держави, а Руснацох окрем рики Дунай тераз дзелї и медзидержавна гранїца. Пре шицко начишлєне сотруднїцтво Руснацох зоз Заґребу - Горватскей з Руснацами з Войводини- Сербиї замарло. Так було донєдавна.

   На поволанку представнїка рускей националней меншини городу Заґребу мр Иринея  Мудрого и його секретара Йоакима Павловича, у просторийох КПД Русинох и Українцох Заґребу, Водоводна улїчка 15, всоботу, 25. октобра отримана нєкаждодньова програма. После прерви длугокей 20 роки у Заґребу знова госцовали Руснаци з Войводини, Сербиї. У першей часци програми Михайло Зазуляк, новинар репортер тижньовнїка Руске слово з Нового Саду, одрецитовал вецей писнї руских писательох, а потим и представел новши виданя Новинско видавательней установи Руске слово и то перши том Позбераних творох Гавриїла Костельника, потим Повист о Данилови и Феркови и Ґаброви Михала Рамача и на концу Ошмих у молги Ксениї Макаї Орос, з надпомнуцом же авторка остатнєй кнїжки особнє пречитала даскельо писнї.

    У другей часци програми Емил Няради, ґлумец аматер керестурского Дома култури, на импровизованей сцени виведол монодраму Барон Минхаузен у режиї Владимира Надь Ачима и одушевел коло 40 присутних патрачох. По законченю програми браца Руснаци зоз Горватскей и Войводини, Сербиї, предлужели заєднїцке друженє, та и зашпивали, а патраче на одходу до своїх домох могли безплатно однєсц рижни кнїжки руских авторох, як и розлични числа Руского слова, Заградки, Маку и Шветлосци. Внєдзелю дополадня, 26. октобра, осемчленова делеґация Руснацох з Войводини, Сербиї, медзи хторима бул и Славко Орос, предсидатель Националного совиту Руснацох Войводини, а котрих у мено домашнїх предводзел Йоаким Павлович, нащивела грекокатолїцку церкву Кирила и Методия и розпатрела штредок Заґребу.

Яким Пушкаш