1. ДЗЕНЬ ПРЕДСТАВНЇКА РУСКЕЙ НАЦИОНАЛНЕЙ МЕНШИНИ ГОРОДУ ЗАҐРЕБУ

госцованє куд "яким ґовля" з миклошевцох и представянє кнїжки шпиванкох янка чордаша

Всоботу, 22. новембра у ресторану Ґлобус, сала Кумровец, на заґребским Велесайму отримани 1. дзень представнїка Рускей националней меншини городу Заґребу.

Представнїк рускей националней меншини городу Заґребу, мр Ириней Мудри, орґанизовал цаловечаршу културну програму. Перше наступели аматере КУД «Яким Ґовля» з Миклошевцох. У 40 минутовй програми, зоз котру концом юния госцовали и у Бардейове и околних валалох у Словацкей, наступели: старша фолклорна секция, хореоґраф Звонко Костелник, водитель Златко Гирйовати, женска шпивацка ґрупа, водитель Агнета Тимко и шпивацки дует Ганча и Гелена Бучково. Аматере з Миклошевцох одушевели патрачох, а окреме приємно нєсподзивала женска шпивацка ґрупа, чийо члени були облєчени до широких сукньох, блузнох зоз свили и зоз фитюлами на глави, а за котру треба спомнуц же освоєла перше место на фестивалу жридлового шпиваня Най ше нє забудзе 2008. у Дюрдьове, як и шестри Бучково котри достали першу награду фахового жирия на Червеней ружи 2008. у Руским Керестуре, а котри шпивали по руски и лемкивски.

            Потим, Янко Чордаш представел кнїжку Руски шпиванки моїм Петровцом и то на цалком ориґинални способ: мишани оркестера, чийо члени за тоту нагоду були зоз Петровцох, Вуковару, Винковцох, Осєку и Заґребу, одграла векшину шпиванкох зоз тей кнїжки, Томислав, Мирчов, Дудаш Семанов их одшпивал, а нащивителє програми за тот час мали нагоду танцовац валцер, танґо и кола! Тей соботи у Заґребу крашнє було буц Руснак!

Яким Пушкаш