Перши спортски бависка местох дзе жию Руснаци

СПОРТСКИ БАВИСКА „ RUTHENIADA ”

Координация радох и представительох рускей националней меншини РГ, а на инициятиву ради рускей националней меншини Вуковарско-сримскей жупаниї, орґанизовала перши спортски бависка местох дзе жию Руснаци, под назву Рутенияда (од латиского мена за Руснацох). Бависка отримани у петровцох, 15. юния, а були подзелєни на два часци.

Єдна часц були стари руски бависка за дзеци - чинаґанє, пиличканє, поцагованє штранґу, воженє фурика и беганє у меху. То екипни спорти и кажда екипа мала штирох гленох. На стадиону ФК Петровци змагали ше 13 екипи зоз Петровцох, Миклошевцох, Винковцох, Вуковару и Осєку.

У другей часци були бависка за вельких и малих - пикадо, шах, столни тенис, а були отримани у Соколани и на валалским стадиону.

Учашнїки бавискох ше позберали внєдзелю рано, уж на 9 годзин. У петровскей сали шицких привитал Звонко Ерделї, задлужени за спорт у жупанийскей ради, потим предсидатель Яким Ерделї, а општински и жупанийски представнїки похвалєли тоту активносц и пожадали шицким добру забаву и успих.

Млади спорташе лєдво чекали же би почали бависка. Велї за спомнути стари бависка анї нє чули, а нє же би их ище бавели.
Учтелька Мая им сцерпезлїво вецей раз потолковала и поуказовала цо и як треба. Мушело ше перше дакус випробовац як ше вибива пиличка и як треба потрафиц чинаґ. Треба и мерковац же би ше дакого не потрафело зоз палїцу. После уж ишло як подмасцене. То була нагода научиц и дацо нове. Шицки екипи ше борелипосцигнуц цо лєпши резултат. Тераз пришли до вираженя и гевти цо можебудз нє знаю шпивац и танцовац, а любя ше дружиц.Красна хвиля помогла же би ше указал спортски дух вецей як 100 учашнїкох. На концу, даєдни були дакус лєпши од ругих, та достали медалї, а шицки достали подзекованя.

У пикаду и столним тенису ше указало же ше млади ровноправно можу бориц процив старших та аж и победзиц.
Конєчни резултати по спртох:

У старих руских бавискох, у котрих участвовали лєм дзеци основношколского возросту, перше место освоєла екипа Оєкз, друга екипа зоз Винковцох, а треце место завжала екипа Миклошевци I.

У шаху победзела екипа зоз Старих Янковцох, друге место освоєла екипа Вуковар91 зпоз Вуковару, а треце место завжала екипа зоз Нових Янковцох.
Поєдинєчно найлєпши бавяч у шаху бул Зоран Лїкар котри бавел за екипу зоз Петровцох, други бул Раде Вуясинович зоз Старих Янковцох и Анте Кнез, тиж зоз Старих Янковцох.

У пикаду найлєпша екипа була зоз Миклошевцох у хторей бавели Мирко Папуґа и Томислав Мудри. Друга була екипа з Вуковару за котру бавели Леон Бурчак и Оливера Югас, а треца була екипа зоз Петровцох у котрй наступели Деян Колбас и Деян Джуджар.

У столним тенису победзела екипа зоз Петровцох, друга була екипа зоз Старих Янковцох и треца екипа Миклошевци I.

По концу шицких бавискох вигладнєти учашнїки ше погосцели на полудзенку у Соклолани. шицки були барз задовольни и виражели дзеку зисц ше знова нарок, як би ше уведла традиция отримованя Рутенияди.

Л.Дїтко

Назад на новосци