У ЗАҐРЕБУ ОТРИМАНЕ МЕДЗИДЕРЖАВНЕ СТРЕТНУЦЕ И РОЗГВАРКИ ПРЕДСТАВИТЕЛЬОХ РУСКИХ ЗАЄДНЇЦОХ З ВОЙВОДИНИ/ СЕРБИЇ И ГОРВАТСКЕЙ
ПРЕШИРИЦ СОТРУДНЇЦТВО У ОБРАЗОВАНЮ, ИНФОРМОВАНЮ И КУЛТУРИ, НАСАМПРЕДЗ ПРЕ ЗОПЕРАНЄ АСИМИЛАЦИЇ
Всоботу пополадню, 7. новембра у Водоводней улїчки число 15 у Заґребу отримане медзидержавне стретнуце и розгварки найвисших представнїкох рускей заєднїци Войводини/ Сербиї и рускей заєднїци у Горватскей. Домашнї того сходу бул мр Ириней Мудри, представитель рускей националней меншини городу Заґребу и його секретар Йоаким Павлович, а у розгваркох ище участвовали: Славко Орос, предсидатель Националного совиту Руснацох; Дюра Папуґа, предсидатель Рускей матки Сербиї и Шветовей ради Руснацох, Русинох, Лемкох; Ярослав Сабол, подпредсидатель Националного совиту и представитель Городского одбору Рускей матки Нового Саду; Йоаким Надь, секретар Месней заєднїци Руски Керестур (шицки з Войводини/ Сербиї), Яким Ерделї, предсидатель Координациї радох рускей националней меншини у Горватскей; Любица Морган, предсидателька Союзу Русинох и Українцох РГ; Звонко Костелник, член Совиту за национални меншини РГ; Яким Вашаш и Таня Кренїцки зоз Петровцох, предсидатель и подпредсидателька Ради рускей националней меншини у општини Боґдановци; Владо Гаргаї, подпредсидатель Ради рускей националней меншини у городу Вуковар; Мария Хома з Миклошевцох, предсидателька Ради рускей националней меншини у општини Томповци; Марияна Джуджар, секретарка Координациї руских радох у РГ, як и представителє наших медийох.
Остатнїх рокох интензоване сотруднїцтво Руснацох з обидвох бокох Дуная на културним и спортским планє (госцованє на културних манифестацийох и балох односно участвованє на Спортских бавискох „Яша Баков“ и „Рутхенияди“), алє иснує потреба преширйованя сотруднїцтва и на други обласци, шицко у намаганю же би ше зопарло асимилованє Руснацох, насампредз у Горватскей.
-Барз важне же би ше на идуцим попису жительства у Горватскей цо векше число припаднїкох нашей заєднїци вияшнєли як Руснаци, а нє же би ше ганьбели свойого єства, насампредз пре затримованє здобутих правох котри нам гарантую Устав РГ и други предписаня – гварел мр Ириней Мудри, предсидатель рускей националней меншини городу Заґребу и подпредсидатель Координациї радох рускей националней меншини у РГ. Мудри вихасновал нагоду же би „на живо“ представел нову заставу и герб Руснацох у Горватскей, котри урядово одобрели одвитуюци институциї РГ.
Славко Орос, предсидатель Националного совиту Руснацох Сербиї визначел же Руснаци з Войводини/ Сербиї порихтани дац фахову помоц Руснацом у РГ у образованю (окреме при твореню учебнїкох за виучованє руского язика, а руски школяре з Горватскей могли би ше ознова школовац у керестурскей Ґимназиї и на Одсеку русинистики у Новим Саду), култури (помогло би ше зоз кадрами у обласци музики, фолклору и театру) и информованю (дзе „Рутенпрес“ уж ма значну улогу).
Заключеня зоз того медзидержавного стретнуца одноша ше на можлївосц заєднїцких проєктох Руснацох з Войводини/ Сербиї и Горватскей, а зоз котрима би ше конкуровало и за пенєж з рижних фондох Еуропскей униї, як и на виробенє окремного медзидержавного протокола одн. спорозуменя, котри би представнїки Руснацох з обидвох державох познєйше и подписали, найвироятнєйше у 2010. року.
Яким Пушкаш |
